Taliban-in hmeichhiate university an kal khap
Afghanistan-a rorellai, Taliban chuan an ram hmeichhiate university kal khapna tichhuakin, he khapna hi hman nghal a ni dawn tih an sawi.
Nikuma civil sorkar paihthla a, thuneihna an chan hnu khan Taliban hian hmeichhiate chu secondary school an kal a lo phalsak tawh lo bawk.
Hmeichhiate university kal khapna a siam leh hi ram leh pawl hrang hrangten an dem thu an sawi nghal a, nimin khan Kabul khawpuiah Afghanistan Women's Unity and Solidarity group hming hmeichhe ṭhenkhatin lungawi lohna an lantir bawk. Mahse nawrh huaihawtte hi Taliban official-te chuan an khap zui vat a ni.
UN Special Rapporteur to Afghanistan chuan Taliban thupek tihchhuah thar chu right to equal education palzutna dik tak leh, Afghan society-a hmeichhiate dinhmun tihchhiat lehzualna tur a ni, a ti. US pawhin hetianga khapna a siam hian Taliban-te lakah nghawng a la nei ngeih tur thu a sawi bawk.
Secretary of state Antony Blinken chuan, "Taliban hian an ram mipui zawng zawngte dikna chanvo neih a zahsak hma chuan ram dangin an pawm inring suh se," a ti.
Taliban-te hian nikuma thuneihna an chan tirh khan, sorkar huamzau zawk leh hriatthiamna nei tak din an tum thu sawi mah se, hmeichhiate dikna chanvo leh zalenna neihte chu an hrek chho zel a ni. Taliban hotu Hibatullah Akhundzada leh a thawhpui hnaite chu hmeichhiate zirna sang zawk an zir zel duh lotute an ni.