WHO hotuin China rama Covid hri leng dinhmun ngaihven a ṭul thu a sawi

World Health Organization (WHO) hotu Tedros Adhanom Ghebreyesus chuan China rama Covid-19 hri leng hluar chho mek chu ngaihven a ṭul takzet tih sawiin, China sorkar chu Covid vaccine pek lamah ṭan la zual turin a ngen.

Geneva-a weekly news confe­rence a neihah, Ghebre­yesus chuan China ram dinhmun chu WHO chuan a ngaihven hle tih sawiin, hri kai thar, dinhmun ngaihtuahawm tak tak an pung chho zel a ni, a ti. China ram chu an hri kaite dinhmun, hospital-a dah luh ngai leh ICU-a enkawl ngai awm zatte chiang taka information pe turin a ngen nghal bawk.

China sorkarin high risk-te hnenah vaccine pek a tumnaah WHO chuan theihtawpin a thawhpui zel dawn a ni, a ti.

Kum 2020 aṭang khan China hian Covid hri leng danna turin 'zero Covid' policy a hmang a, khuahkhirhna khauh tak tak a siam a ni. Mahse heng khuahkhirhnate hi hun rei tak hman a nih hnuah an ram mipuite chuan sawiselin, a duh lohnate an lantir a ni. Hei vang hian tun thla tir lam khan thuneitute chuan khuahkhirhna te hi an thlahdul a, mahse hemi hnu lawkah hian hri kai nasa takin an pung chho a ni. Hri kai zingah kum upa lamte chuan an thihpui nasat rin a ni bawk. Health expert-te chuan tuna China rama hri leng dinhmun thlirin, thla thum chhungin an ram mipui 60% vel chuan hri hi an kai thei dawn a, mi maktaduai hnih velin an thihpui theih thu an sawi.

China ram thuneitute chuan Covid vanga thi statistics a siam dan chu tidanglamin, Covid virus vanga thawk lama harsatna neia thite chauh chu Covid vanga thi anga chhiar an ni tawh ang. Natna dang nei tel, Covid hri kai chu an thih pawhin Covid vanga thi anga chhiar an ni lo a, hei vang hian a hmaa Covid-19 vanga thi nia chhinchhiah ṭhenkhat pawh tally aṭangin paih an ni.

WHO emergency director Mike Ryan chuan China-in hri kai leh hri vanga thi zat report a pek chu a tlem theih hle laiin, ram chhunga damdawi-in hrang hrangte erawh hri kai enkawl ngai vangin an lun hle a, ICU pawh a khat thei hle niin a sawi. Hei vang hian China hian thil awm dan dik tak a report lo nia a ngaih thu a sawi.