Netanyahu-a'n right-wing ṭangrual sorkar a siam thei ta

Benjamin Netanyahu chuan Israel sorkar thar a pian thu sawiin, an ram chanchinah right-wing ṭangrual sorkar hotu ni turin a lo kir leh dawn a, a term rukna atan Israel Prime Minister a ni leh thei dawn ta.

November thlaa in­thlanpui an neiha hnehna a chan hnuah, Netanyahu chuan ultra-Orthodox Jewish party leh extreme-right bloc thlawpna hnuaiah sorkar thar a siam theih thu a sawi.

Kum li chhunga inthlan­pui ṭum li nei tawh Israel-ah hian Netanyahu chuan an ram politics chiri tawh tak chu a titawp thei dawn niin a lang a, kum 2021-a amah paihthlatu ṭangrual sorkar chu a thlak dawn a ni.

Eiruk thubuai nei mek, Netanyahu hi Israel ram chanchina Prime Minister nihna chelh rei ber niin, kum 1996-1999 inkar leh, kum 2009-2021 inkar khan kum 12 chhung ram hotu lu ber dinhmun a lo chelh tawh a ni. Sorkar thar din tura a hun tiam chu nizan khan a tawp a, huntiam hmain ṭangrual sorkar din turin party dang nen inremna hi an siam fel hman ta a ni.

Netanyahu kaihhruai Likud party chuan ultra-Orthodox party leh, Religious Zionism alliance hnuaia extreme bloc member-te nen ṭangrual sorkar siam tur hian inremsiamna hi an siam a ni.

Netanyahu-a thawh­pui tur party-te hi Pakistan ram hran din thlawp lotute an ni a, hei vang hian sorkar thar hnuaiah Israel-in Palestinian ram, West Bank-a a luahsak mekah Israel dinhmun pawh an sawhngheh zawk rin a ni. Hei bakah ṭangrual pawl hian Netanyahu-a'n eiruk leh a thuneihna dik lo taka hmanga puhna thubuai a neih mek tihtawp a ni theihna turin dan siamṭhat pawh an rawt tawh bawk.

Kum 73 mi, Netanyahu kaihhruai ṭangrual sorkar thar lakluh hun tur hi sawichian la ni lo.