Shanghai khawpuia chengte Krismas lawma chhuak lo turin ngen

China rama Covid-19 hri leng hluar chho zel avangin Shanghai khawpui thuneitute chuan Krismas lawma chhuak lo turin khawpuia chengte an ngen.

Shanghai Municipal Health Commission chuan mipui, a bikin thalaite chu punkhawmna hmunte siam lo leh, tel lo turin a ngen. China ah hian Krismas lawmna hi a hranpaa siam ni ngai lem lo mah se, thalaiten intihhlimna hun leh, chhungkua inhmuhkhawmna hun atante an hmang thin a ni. Shanghai khawpui bikah chuan Krimas pual bazar bakah, restaurant hrang hrangten Krismas party-te an buatsaih thin a, kuminah chuan hri a hluar chhoh leh tak vangin an cancel tawh hlawm a ni.

China health authority chuan nimin khan Covid-19 hri vei, symptom nei hmuhchhuah thar mi 4,132 an awm a,hripui vanga thi hi a zawnin ni li an awm tawh lo bawk niin a tarlang. Mahse China report tihchhuah hi tam takin an ring tawk lo. Report thenkhat chuan tun kar chhung ringawt pawn hri kai thar hi mi maktaduai 37 dawn an tlin a rinawm thu an tarlang.