France-ah serial killer Charles Sobhraj thawn haw

Nepal court in a chhuah zalen tak, serial killer 'The Serpent' tia sawi, Charles Sobhraj chu Nepal sorkar chuan Zirtawpni khan France ramah a thawn haw a, kum 10 chhung chu Nepal leilung rap lo turin a ti nghal bawk.

Kum 78 mi, Charles Sobhraj hi 1970 chhoa Asia-a khawtlang lam khualzin kal eng emaw zat thattuah puh a ni. Kum 1975 -a North American pahnih a thah thubuaiah kum 2014 kha thiam loh chantirin kum 20 tang tura hrem a ni. Mahse Nilaini khan Nepal Supreme Court chuan Sobhraj-a legal team-in a kum upat leh hrilselna that tawk loh avanga chhuah tura a ngenna a ngaihtuah hnuin, jail chhunga a nungchang a that bawk avangin chhuah a remti ta a ni. Nepal danah chuan thiam loh changa jail tantirte chu tan in chhunga an nungchang a that a, an tan hun tur 75% an tan tlin tawhte chuan court in a chhuah zalen thei a ni.

Sobhraj hi kum 1972-1982 inkar khan mi 20 chuang thatah puh a ni. A hmingah 'The Serpent' tih vuahsakin, a chanchin hi TV drama ah pawh siam a lo ni tawh a ni. Nepal ramah a tan hma hian French khualzinte ei tura tur telha puh chungchangah India ramah hun rei tak jail a lo tang tawh bawk.