Krismas hmang turin Bethlehem-ah mi tam tak kalkhawm

Kristiante hun pawimawh, Krismas hmang turin khawvel ram hrang hrang aṭangin Kristian tam tak chu Bethlehem khuaah an kalkhawm.

Israel-in a luah mek, West Bank-a Bethlehem khuaah hian Covid-19 hri leng vangin kum hnih chhung chu Krismas lawm turin khualzin an pungkhawm thei lo a ni. Kuminah erawh Isua Krista pianna hmun tlawh a, Krismas lawm turin Church of the Nativity bulah mi tam tak an kalkhawm thei ta a ni.

Tihdan phung angin Krismas urlawk ni, Inrinni chawhnu khan Jerusalem atangin Bethlehem panin kawng an zawh, Jerusalem-a Latin priest Pierbattista Pizzaballa chuan kawngzawh hi a ho a ni. Kawngzawh hnua biak-ina thu a sawiah, "Israel-Palestinian buaina te, Ukraine rama indona thleng mekte vangin hun harsa tak khirh tak kan hmachhawn mek a ni. Mahse he Krismas hian muanna a rawn thlen kan duh a ni," a ti.