Afghan University zirlai mipaten hmeichhiate zirna khapsak duh lohna lantir

Afghanistan-a rorellai, Taliban-in hmeichhiaten University an kal a khapsak chu an demna leh duh lohna lantirin, university-a zirlai mipuite chuan class an boycott.

Zirlai mipuite chuan hmeichhiate tana university hawnsak an nih hma chuan class an kal dawn lo tih an sawi.

Hmeichhiate tana zirna sang zawk zir khapsak an ni chu an thlawp loh thu leh, mipate ang bawka an zirna chhunzawm phalsak an nih hma chuan zirna chu chhunzawm an tum tawh bik lo tih an sawi. "Kan farnute tan university kharsak a ni. Keini pawh kan kal tawh bik lo ang," tiin lungawlohna lantirte chuan an sawi a ni.

Kabul University-a lecturer-te chuan Taliban thuneitute chuan a thutlukna siam chu ngaihtuah ṭha leh turin an ngen a, zirna chhunzawm khap chu thil vanduaithlak tak a ni tih an sawi.

Taliban sorkara ministry of education chuan tun thla tir lam khan hmeichhiate tan zirna sang zawk, university an kal khapna hi a tichhuak a, hei hi khawvel ram hrang hrang pawhin an sawisel nasa hle.