US-ah khawvawt kaihhnawihah mi 32 thi
US-ah thlasik thli tleh avangin khua nasa taka vawtin vur tla chhah lam chu inches 43 te a tling. He thlipui tleh avanga khaw vawt lutuk kaihhnawihah hian mi 32 an thi a, mi tam tak power supply nei loin an awm phah bawk.
Thli tleh hian Canada border bul, Great Lakes aṭanga Mexico border bul, Rio Grande thlengin a nghawng a ni.
New York-a Buffalo khua chu a tuar nasa ber niin, thli vawt tak tleh leh vur tla chhah tak vangin emergency service pawh kalpui hleih theih lohin a awm.
Hetianga thawk leh khata khaw vawt lutuk rawn thlen tu hi 'bomb cyclone' an ti. Bomb cyclone-ah chuan chak takin pressure a tlahniam a, darkar 24 chhungin milibarr 24-ten an tla thla a ni. Climate campaigner-te chuan global warming vangin bomb cyclone hi a la thleng fo thei niin an sawi.
US Nation Weather Service chuan mipuite chu zin veivak rih lo turin a hrilh. Khawvawt tak hnuaia veivah chuan vawtin a hmetna thei dawn a, khawvawt hnuaia an chhuah rei phei chuan hypothermia bakah thihna thleng pawhin a thlen thei dawn a ni, a ti. US-a state 48-ah chuan khawvawh lam hi freezing point hnuai lam a ni hlawm. Vur a sur nasat avangin flight tam tak cancel a ni. Khawvawt kaihhnawiha thi mi 32-te hi state pakua ami niin, an zinga 13 hi Buffalo khaw awmna, Erie County chhunga mi an ni. Official-te chuan thi zat hi an la punchhoh an rin thu an sawi.
Thli tleh vang hian Pathianni khan flight 3,000 cancel a ni a, Inrinni khan 3,500 cancel a ni a, nimin khan flight 1,000 chuang cancel a ni leh bawk.