China-in Covid khuahkhirhna thlahdul belh dawn

China ramah Covid-19 hri kai nasa takin pung chho zel mah se, thuneitute chuan Covid Zero policy hnuaia khuahkhirhna siam chu an thlahdul belh leh dawn.

Kum 2023, January 8 aṭang chuan kum thum chhung an lo hman tawh, ram dang aṭanga khualzin lutte inkhunghrang hmasa tura a tih ṭhin chu a titawp tawh dawn. Khualzin lut turte tan a hma darkar 48 chhunga Covid test negative result chauh neih a ngai tawh dawn tih National Health Commission thuchhuah chuan a tarlang. Kaihhruaina an hman mekah chuan khualzinte hi China ram an luhin ni riat chhung inkhung hrang phawt turin an ti ṭhin a ni.

Hetih lai hian mipuite nawrna avanga November thla tawp lama Covid khuahkhirhna khauh tak siamte thlahdul a nih hnuah China ramah hian hri kai an pung chak hle. Mahse official-te chuan an rama leng mek, Omicron variant chu khawvel ram hrang hranga thihna tam tak thlentu, Delta variant ang em emin a hlauhawm loh niin an sawi. Kum 2020 aṭanga Covid-19 hri leng, infectious disease top caterogy A a dah pawh, kum thar aṭang chuan category B ah dah thlak an tum bawk.