'Zahngaihna kan lantir dawn lo' - Iran President

Iran president Ebrahim Raisi chuan an ram sorkar dodal zawnga chete chungah zahngaihna an lantir dawn lo tih a sawi.

Iran ramah hian hijab dan zawm ṭha loa puh, Mahsa Amini chu police-te kuta a awm laia a thih avangin mi tam takin lungawi lohna an lantir a, thla thum chuang chu ram chhung hmun hrang hrangah nawrh huaihawt a ni tawh a, nawrh huaihawt leh security force-te inkara buaina chhuakah mi eng emaw zatin nunna an chan tawh bawk a ni.

Tehran-a mipui pungkhawmte hmaa thu a sawiah, President Raisi chuan sorkar chu mitin tan a inhawng a, hemi rual hian sorkar dodal tlatte chungah chuan zahngaihna an lantir dawn lo tih a sawi.

Tun thla tir lam khan Iran sorkar hian nawrh huaihawtna inhnamhnawih mi pahnih chu thiam loh chantirin a lo tihlum tawh a ni. Midang pakua pawh thi turin an chungthu a relsak tawh bawk.

Iran official-te chuan tualchhung buaina t hlengmekah ram dangte inhnamhnawihah puhin, a bikin US leh EU ram ṭhenkhat an inrawlh niin a sawi. An ram mipuite hmanruaah hmangin, Islamic society tihchhiat an tum niin an puh. Mahse ram dangte hian an thil thum hi an tihlawhtling dawn chuang lo niin Raisi chuan a sawi.