Pope hlui Benedict dinhmun a ṭha lo - Ṭawngṭai sak turin Pope Francis-a'n ngen

Roman Catholic kohhran hruaitu hlui, Pope Emeritus Benedict chu a hriselna dinhmun a ṭha lo hle a, kohhrante hnenah ṭawngṭai sak turin Pope Francis chuan nimin khan a ngen.

Kum 95 mi, Benedict hi kum 2013 khan a hriselna ṭhat tawk loh vangin kohhran enkawl hna chu a tlin tawh lo nia sawiin, Pope a nihna aṭangin a bang a, a thlaktu atan Pope Francis hi thlan a ni. Kum 600 chhunga Pope aṭanga bang hmasa ber a ni. Kum 2005-ah Pope John Paul II a thih hnuah a thlaktu atana thlan niin, German mi zingah kum 1,000 chhunga Pope ni thei hmasa ber a ni.

A hriselna ṭhat tawk loh avangin mipui hmuhah pawh a inlan khat hle. Mipui hmuha a inlan hnuhnung ber chu December 1-a a hming chawina theologian-te lawmman siam semnaah khan niin, hemi ṭum pawh hian a chak lo tawh hle.

Nimina Vatican-in thuchhuah a siamah, Benedict chu a chau zual hle tih sawiin, damdawi lam thiamten an vil reng thu a tarlang. Pope Francis pawhin mipuite hnena ṭawngtai sak tura a ngen hnuah, Benedict hi a tlawh nghal a ni.