Russia-in Ukraine khawpui hrang hrang missile-in kap leh

Russia chuan nimin zing khan khawmual leh tuipui aṭangin Ukraine khawpui hrang hrang chu missile tam tham takin hmangin a bei leh.

Ukraine khawpui Kyiv bakah Kharkhiv, Odesa, Lviv leh Zhytomyr-te chu missile hmangin kah an ni a, Ukraine sipaite chuan Russia missile kahchhuah zinga 54 chu an lo dang niin an sawi.

Ukraine air force chuan Russia hian air and sea-based cruise missile hmangin hmun hrang hrang an bei tih sawiin, Kamikaze drone pawh an hmang tel niin an tarlang. Russia hian an rama energy infrastructure-te chu an rawn bitum niin an sawi bawk.

President Volodymyr Zelenskyy-a adviser, Mykhailo Podolyak chuan Russia hian missile 120 chuang an kapchhuak niin a sawi. Russia chet dan chu thil tenawm tak, energy infrastructure bitum leh civil mi tam takte thihna thlentir tumah a puh.

Kyiv mayor Vitaliy Klitschko chuan Russia beihna avang hian khawpuia cheng 40% ten power supply an nei lo tih sawiin, mipuite chu an theih anga tui khawlkhawm turin a chah nghal a ni. Lviv khuaa cheng 90% chuan power an nei lo bawk. Odesa leh Dnipropetrovsk bialah mi tam tak power nei loin an awm phah bawk a ni.

Russia chuan Ukraine ram a beih mekah civil mite bituma puhna chu a pha zel a, mahse energy facility-te an kap chhia ti erawh tun hnaiah Russia president Vladimir Putin ngei pawhin a lo sawi tawh a ni.

Ukraine-in kumthar tir lam aṭanga inremna kawng zawnga inbiak a rawtna Russia-in a hnawlsak hnu lawkah, Russia sipaite chuan Ukraine khawpui hrang hrang hi an bei zui leh nghal a ni. Ukraine intelligence chief, Kyrylo Budanov chuan Russia hian civilian infrastructure-te a beih chhunzawm zel a rinawm thu a sawi.