Ram ṭhenkhatin China khualzinte tan khuahkhirhna siam

China rama Covid-19 hri darh chho mek avangin ram ṭhenkhat chuan China ram aṭanga khualzin lutte tan kaihhruaina an siam thar leh mek.

Hri leng hluar chho zel karah China hian January 1 aṭangin ramrite hawng vekin, Covid-19 vanga ram dang khualzinte tana khuahkhirhna alo siamte chu thlahdul a tum mek a, hetih lai hian China khualzinte tana ram ṭhenkhatin khuakhirhna an siam thar ve leh thung.

Italy, Japan, Taiwan leh Japan chuan China aṭanga lutte chu Covid test neih ngei ngei turin dan thar an tichhuak a, nimin khan US pawhin Covid test neihsak zel an ni dawn tih a sawi ve leh.

China hian nikhata hri kai thar hi mi 5,000 bawr vel niin sawi mah se,zirchiangtute chuan hri kai thar zat hi thup ṭhen nia sawiin,nikhat hri kai thar hi maktaduai khat dawn an tlin a rinawm thu an sawi. Hospital-te an lunin an khat hneh hle a, damdawi pawh lei tur a vang niin report ṭhenkhat chuan an tarlang.

China foreign ministry chuan an rama hri leng chu an thunun thei tawh niin a sawi a, mahse Pathianni aṭang khan official-a ni khata hri kai thar leh thihpui zat data tihchhuah ṭhin chu a tihtawp a, hei bakah hian Covid vanga thi nia an chhiar dante a thlak danglam bawk.