Myanmar Court-in Suu Kyi-i thiam loh chantir leh ; Kum 7 jail tang tura hremna a pek belh

Myanmar-a sipai court chuan nimin khan an ram hruaitu hlui, Aung San Suu Kyi-i eirua puhna thubuai chu ngaihtuah lehin, thiam loh a chantir a, kum sarih jail tang turin hremna a pek belh leh.

Kum 2021 February thla sipaiten civil sorkar thuneihna an hnehchhuh hnuah, kum 77 mi Suu Kyi-i hi hreng zui nghalin, thubuai eng emaw zat a siamsak a ni. Nimina eirua puhna thubuaia thiam loh chantir anih hma hian, a thubuai dangah pawh thiam loh chantir a lo ni vek tawh bawk.

A hmaa hremna lo pek tawhte nen, sipai court hian Suu Kyi-i hi kum 33 tang turin a hrem ta a ni. Sipaiten an hren hnua thubuai an siamsakte chu ngaihtuah kim vek a ni tawh nia sawi a ni. Suu Kyi-i chuan an puhna hrang hrangte hi thu dik lo vek niin a sawi tawh a, a ukil-te chuan a thubuai hrang hranga court thutlukna siamte hi court sang zawkah an appeal dawn nia sawi a ni.

International Crisis Group hruaitu Richard Horsey chuan sipai sorkar hian Suu Kyi-i hi house arrest angin a hremna hi a tlak tir dawn em tih chu zawhna lian tak a ni tih a sawi a, hemi rual hian sipaite hian thutlukna siam hi an hmanhmawh a rinawm loh thu a sawi bawk.

Suu Kyi-i leh a thawhpuite laka thubuai tam tak siam hi sipaiten an thuneihna sawhnghet a, Suu Kyi-i'n politics a khelh chhunzawm tur danna atana an ruahman niin analyst-te chuan an sawi thung. Human Rights Watch-a deputy Asia director Phil Robertson chuan sipai-te thunun court-ah Suu Kyi-i tan rorelna dik tak hmuh ngaihna a awm lo a ni,a ti.

UN Security Council chuan kar liam ta khan Myanmar civil sorkar paihthlak anih hnua Myanmar chungchanga resolution hmasa ber siamin, sipai sorkar chu Aung San Suu Kyi chhuah zalen turin a ti a ni.

Assistance Association for Political Prisoners chuan Myanmar sipaiten thuneihna an chan hnuah sipai sorkar dodaltu zinga mi 2,465 chu thah an ni tawh a, mi 16,000 chuang man an ni tawh bawk niin a sawi.