Israel Prime Minister thar atan Netanyahu lakluh a ni

Benjamin Netanyahu chu Ningani khan Israel prime minister thar atan lakluh a ni leh a, right-wing ṭangrual sorkar a kaihruai ang.

Parliament, Knesset-ah ṭangrual sorkar thar hian fiahna a paltlang hnuah, Netanyahu hi PM atan rinawmna thu tiamtira lakluh a ni. Israel Prime term rukna a chelhna tur a ni.

Netanyahu hi Israel prime minister dinhmun chelh rei thei ber a ni a, mahse nikum khan party pariat ṭangrual sorkar chuan PM aṭangin an paihthla a ni. Mahse ṭangrual pawl hi nikum June thlaah kehdarh lehin, November thlaa inthlanpui neihah Netanyahu kaihhruai Likud party leh a thawhpuite chuan hnehna an chang zui a, sorkar thar an siam leh ta a ni.

PM Netanyahu kaihhruai right-wing sorkar thara an thawhpui zingah hian Israel-in Palestinian ram a luah pawmtu leh two-state solution siam duh lotu, langsar taka LGBTQ dodaltute an tel a, hei vang hian sorkar thar hi Palestinian leh LGBTQ lam chuan an ngaimawh nghal hle. PM thar lakluh ni pawh hian Parliament pawn lamah mi tam tak chu lungawi lohna lantirin an pungkhawm a, Tel Aviv-ah pawh sorkar thar duh lohna lantir a ni bawk.