Pope Emeritus Benedict XVI a thi

Kum riat chhung Roman Catholic kohhran hruaitu lu nia lo kaihruai tawhtu, Pope hlui Benedict XVI chu kum 95 mi niin nimin khan a thi.

Holy See Press Office chuan kum 2013-a Pope a nihna aṭanga bang, Pope Emeritus Benedict XVI hi kohhran hruaitu a nihna aṭanga a chawl hnua a chenna, Master Ecclesiae monastery-ah a thi tih a puang.

Benedict ruang hi Thawhṭanni hian Saint Perters Basilica-ah lak a ni dawn a, he hmunah hian January 5-ah Saint Peter's Square-ah vuina hun hman a nih hma chu dah a ni ang.

Germany rama piang, Bavaria-a seilian, Joseph Alois Ratzinger hi kum 2005, April 19 khan Pope atan thlan a ni a, hemi hnu hian Pope Benedict XVI tia vuah zui a ni. Kum riat chhung Roman Catholic kohhran hruaitu lu dinhmun a chelh hnuah, a taksa chak lo leh kum upat tawh avangin taksa leh rilru lamah kohhran enkawl hna chu a tlin tawh lo nia sawiin kum 2013 khan Pope aṭangin a bang a, kum 600 chhunga Pope nihna aṭanga bang hmasa ber a ni.