China-a Covid-19 hri leng mek chungchangah WHO-in chanchin chiang zawk tarlang turin duh

World Health Organization (WHO) chuan China rama Covid-19 hri leng mek chungchang an ram dinhmun chiang zawk hriat a ngai a tih a sawi. Hemi rual hian ram ṭhenkhatin China aṭanga khualzin lutte khuahkhirhna an siam chu thil hriatthiamawm tak a nih thu a sawi nghal bawk.

China sorkarin 'zero Covid' policy a hlih hnuah, hri kai thar nasa takin an pung mek a, hei vang hian ram eng emaw zat chuan China aṭanga an rama lut turte tan kaihhruaina leh khuahkhirhnate an siam thar leh a ni.

WHO hotu Tedros Adhanom Ghebreyesus chuan, China rama hri leng a hluar chhoh mek laia an ram dinhmun dik tak an tarlan ṭhat loh avangin, ram dangin khuahkhirhna an lo siam chu hriatthiamawm tak a ni, a ti. China chu an hri leng dinhmunte chiang zawka tarlang ṭhin turin a ngen nghal bawk.

Zirtawpni khan China health official-te leh WHO offiicial-te chuan video conference neiin, hri leng dinhmun te, hri lengte enkawlna pek an nih dan te, vaccine pek chhuah dante an sawiho a ni.

Hetih lai hian China chuan ram dangte hnenah data ṭha takin a hriattir zel niin a sawi thung a, ram ṭhenkhatin China khualzinte laka khuahkhirhna an siamte pawh science behchhana an tih a ngai niin a sawi. Foreign ministry thupuangtu Wang Wenbin chuan an health system himna turin hma an la reng a, hri kaite pawh ṭha taka enkawl an nih thu a sawi.

Kum 2019 kumtawp lama China-a Wuhan khawpuia Covid-19 hri hmuh chhuah a nih aṭang khan khawvel pumah he hri avanga thi hi mi maktaduai 6.7 dawn an tling tawh a ni. Ram tam berah hri leng a ziaawm a, khuahkhirhna leh kaihhruaina siamte hlih a nih hnuah, tun hnaiah China ramah hian Omicron BF.7 vangin hri kai an pung chho leh nasa hle a ni.