Brazil President atan Lula lalut

Brazil president thar atan nimin khan Workers Party (PT) hruaitu, Luiz Inacio Lula da Silva chu rinawmna thu tiamtira lakluh a ni.

Veteran left-wing politician, Lula tia hriat lar hi kum 2003-2010 inkar khan Brazil President a lo ni tawh a ni. Nikum October thlaa inthlanah khan president ṭanglai, Jair Bolsonarochu hnehin President a rawn ni leh ta.

Nimina President thar lakluhna tura hian President kalchhuak Bolsonaro thlawptu lamten harsatna an siam venthawn thilah venhimna lam pawh an tikhauh hle. Bolsonaro hian amah thlaktu lakluhna hian tel tum loin, Zirtawpni khan US-ah a zinchhuak. President thar lakluhnaah hian president kalchhuak hian boruak ṭha tak hnuaiah thuneihna inhlanchhawn a ni tih lantirna turin, presidential sash a hlan ṭhin. Mahse Bolsonaro chuan a hma aṭangin President thar lakluhnaah tel a tum loh thu a lo sawi tawh a ni.

President thar lakluhna hi an ram khawpui, Brasilia-a Congress building awmna, Esplanade of Ministries-ah neih a ni. He hun hmang tur hian ram chhung hmun hrang hrang aṭangin mi tam tak an kalkhawm a ni. Venhim hna thawk turin khawpuiah hian police officer 10,000 vel duty tir an ni. President thar lawmna pualin music festival, Lulapalooza"tia an sawi chu neih a ni bawka, he hunah hian an ram artist lar 60 chuang zet an inlan.