Ukraine-in Russia sipai 400 an tihlum niin sawi

Ukraine chuan Russia-in an ram a luahsak, Donetsk bial chu missile-in an kap a, Russia sipai 400 vel an thi niin a sawi.

Ukraine sipaite missile kahchhuah hian Makiivka khuaa Russia sipaite inkulhna building a fuh a ni. Thi zat an sawi hi finfiah theih a ni lo a, mahse Russia lam pawhin Ukraine missile kahchhuah avang hian thi an awm ngei tih a sawi a, a zat erawh a sawilang lo.

Hetih lai hian Russia chuan Ukraine khawpui, Kyiv chu a la bei chhunzawm zel bawk.

Ukraine sipaite chuan Donetsk bial an beihnaah hian Russia sipai 400 an thih bakah, mi dang 300 vel an hliam niin a sawi. Ukraine lam hian nitin deuhthaw Russia sipai eng emaw zat an that niin an tarlang ṭhin a, mahse hengte hi finfiahna tak a awm lo. Pathiannia Makiivka khua Russia sipaite awmna hmun an kah hnu lawkah, Russia sipaite hian Kyiv-a infrastructure-te an kap zui veleh nghal niin governor Oleksiy Kuleba chuan a sawi. Russia hian Kyiv khawpui beihna atan hian Iran siam Shahed drone an hmang niina sawi bawk.

Russia-in Iran drone siam a hman 39-te chu sipaite chuan an kapthla vek niin an sawi a,mahse Kyiv khaw mayor Vitaly Klitschko chuan energy facility-te a chhia a, power leh heating supply thlengin a tihbuai phah niin a sawi thung.

Thla eng emaw zat chu Russia hian beihpui a thlaknaah energy infrastructure lam a bitum tawh a, power station-te tihchhiatsakin, thlasik khawvawt tak karah Ukraine mi tam tak chu power supply nei loin an awm a ni.