Israel security minister-in Jerusalem holy site a tlawh Palestinian-te Minister chungah an lungawi lo

Israel far right sorkar thara national security minister, Ben-Gvir chuan Al-Aqsa mosque awmna, Jerusalem holy site chu nimin khan a tlawh. Hei hi Palestinian-te chuan nasa takin an sawisel nghal a, boruak ṭha lo zawk a chawk chhuak thei niin an sawi.

Hetih lai hian Ben-Gvir chuan a twitter-ah, "Temple Mount chu mitin tan hawn a ni," tiin, Juda-ten he hmun an sawina hming chu hmangin a rawn tarlang. Thlalak pawh a dah lang tel bawk.

Israel official chuan Minister hian a hmaa ruahmanna siam tawh angin rei lote chauh a awm tih a sawi. Inremna an lo siam tawh angah chuan he hmun hi Muslim ni loten an tlawh phal a ni a, mahse ṭawngṭaina hun erawh an hman phalsak an ni lo thung.

Jewish Power party hruaitu, Ben-Gvir hi prime minister Benjamin Netanyahu kaihhruai ṭangrual sorkar a tel ve hi Palestinian lam chuan an ngaimawh nghal hle. Ben-Gvir hi Israel-in Palestinian ram a luah thlawptu ruh tak leh, Israel-Palestinian ram dinna tur, two-state solution dodaltu a ni. Palestinian foreign ministry chuan extremist minister Ben-Gvir-a'n Al-Aqsa mosque awmna hmun a tlawh chu an dem thu sawiin, Hamas thupuangtu pawhin Al-Aqsa chu Palestinian, Arab leh Islamic-te a ni reng dawn a, tumahin an thlak danglam dawn lo tih a sawi bawk.

Ben-Gvir hian mosque hi tlawh lo nia sawi a ni. Hamas-te vauna chu chhang let nghalin, "Hamas-te hian an mi vauna hmanga min dang thei nia an inngai a nih chuan, hun a danglam tawh tih an hriat a ngai. Jerusalem-ah sorkar a awm a ni," a ti.

Al-Aqsa compound hi Muslim-ten Noble Sanctuary tih an sawi niin, khawvela Islam hmun thianghlim pathumna a ni a, mahse he hmunah vek hian Juda te hmun thianghlim, temple a awm ve bawk.