Shanghai khawpuia cheng 70% in Covid-19 hri an kai ring

Shanghai Covid expert advisory panel member leh Ruijing Hospital vice president, Chen Erzhen chuan Shanghai khawpuia cheng mi maktduai 25 zinga a tam zawk, 70% vel chuan Covid-19 hri an kai tawh niin a chhut.

China ramah Covid-19 hri leng thar leh mekah hri kai an pung chak hle. Sorkar lam chuan nitina hri kai thar leh thihpui zat hi a puangzar tawh lo a, mahse hospital leh ruang dahna hmunte a lun hle.

Omicron variant leng mek hi khawpui hrang hrangah pawh a darh nasa tawh a, expert-te chuan kumin kumtir lamah a peak hi a thleng dawn niin an chhut. Beijing, Tianjin, Chongqing leh Guangzhou khawpuiahte chuan a peak hi a thleng tawh niin an sawi bawk.

Chen chuan Shang­hai-a an hospital-ah emergency-a admit hi nitin mi 1,600 velte an awm ṭhin thu sawi­in, sorkarin Covid khuahkhirhna a hlih hmaa admit ngai aiin a letin an tam zawk a, damlo admit zinga 80% chu Covid hri kai an nih ṭhin thu a sawi.

Hetih lai hian China chuan an rama hri leng hluar zel mah se, Covid-19 khuahkhirhna a lo siamte chu a hlih belh zel. January 8 aṭangin ramrite pawh a hawng vek tawh dawn a ni.

Ram eng emaw zat chuan China aṭanga khualzin lutte khuah­khirhna tur hi an siam tawh a, hei hi China chuan a sawisel thung. Mahse US chuan China sorkarin an rama hrileng dinhmun a tarlan ṭhat loh avangin, khualzinte aṭanga hri darh leh hi a hlauhthawn­awm avangin khualzinte khuah­khirhna siam hi a ṭul niin a sawi a ni.