Myanmar sipai sorkarin Independence Day-ah tang 7,000 chuang a chhuah

Myanmar-a rorellai, sipai sorkar chuan nimin khan an ramin zalenna an chan ni champha lawmna pualin tang mi 7,012 an chhuah tih sipai hotu chuan nimin khan a puang a, tun thlenga an ram ṭanpuitute chungah lawmthu a sawi nghal bawk a ni.

Kum hnih dawn liam taa Aung Sang Suu Kyi kaihhruai mipui sorkar an paihthlak hnuah, Southeast Asia ram hian khawvel ram hrang hrang, a bikin khawthlang ramte enhran leh hrek an tawk mek a ni. "Ramdang leh region te, organisation leh mimal dawhthei taka min dawrtute chungah kan lawm hle. Kan ramin hun harsa, sawisel leh beih a tawh lai pawha min ṭan tlat avangin ka lawm hle a ni.' tiin Myanmar independence day vawi 75 lawmna puala thuchah a sawinaah a tarlang.

Myanmar sipaiin February 1, 2021-a Suu Kyi kaihhruai sorkar an paihthlak hnuah tualchhung buaina a thleng fo a ni.

Suu Kyi leh a thawhpui official dangte chu mipui tlawh pawh theih loha khunghran an ni a, lungawi lohna lantirtute chungah tharum thawhna lantirin, mi sang chuang­in tawmhimna zawngin an ram an tlanchhiatsan tawh a ni.

Hetihlai hian, tunhnaiah Suu Kyi hi eiruk thubuaiah thiam loh chantirin kum sarih chhung lungin tang tura hrem a ni a, sipai sorkar chuan an hmelma lian ber chu an mahni tibuai thei lo tura khung hran tumin a chungah thubuai enge maw zat an siamsak a ni. Suu Kyi hi Naypyitaw tan-inah hren mek niin, sipai lam thuneitute chuan independent court-in rorelna fel tak a siamsak tih an sawi.

Thuneitute chuan Myanmar-in Bristish awpna aṭanga zalenna an chan champha denchhenin tan-ina tang mi ṭhahnem tak an lo chhuah ṭhin a ni.

State broadcaster MRTV chuan tang an chhuah zingah tualthat, mi pawngsual, puak thei chi kawl ru, dan phal loha pawl din bakah, ralthuam leh damdawi zawrh phal loh kawl ru, natural disaster management leh kuttling loa sum lalutte chu kuminah hian chhuah an nih ve loh tur thu a sawi.