Pakistan sorkarin energy renchem nan Mall leh wedding hall khar hun tihma
Sum lama harsatna tawk mek, Pakistan sorkar chuan an ram economy siamṭhat tuma a hmalak meknaah, energy renchemna atan market, mall leh wedding hall-te inkhar hun a sawn hma.
Pakistan cabinet minister-te chuan energy renchemna tur leh, ram dang aṭanga oil lakluha an innghat lutuk tihziaawmna turin National Energy Conservation Plan chu an lo pawm tawh a ni.
Defence Minister Khawaja Asif chuan, "Market leh mall-te chu zan dar 8:30-ah khar vek tur a ni a, wedding hall pawh dar 10-ah an inkhar tawh ang. He ruahmanna hmang hian Rs tld 60 vel zet kan hum thei dawn a ni," a ti.
Heng bakah hian ruahmanna dang an siamah chuan, February 1 aṭangin ram chhunga incandescent bulb siam chhuah tihtawp vek leh, July thla aṭanga fan siam chhuah tihtawpte a tel.
Minister chuan sorkar building leh office-ah pawh plan hnuaiah hian energy hman tihtlem a ni dawn a, in aṭanga hna thawh theih dan tur pawh tihfel thuai a ni dawn tih a sawi. Sorkar department hrang hrangte energy hman chu 30% a tihtlem tum a ni.
Cabinet meeting-ah pawh eng chhit a ni lo a, ni eng an ring tih minister chuan a sawi. Ram pumah energy renchemna tura ruahmanna siam chu hman nghal a ni dawn a, cabinet minister-te chuan a thlithlai reng dawn tih a sawi.