Russia President-in ni 2 chhung inkahhai puang

Russia president Vladimir Putin chuan Ukraine nena an indo meknaah, nimin leh vawiin atan inkahhai a puang. Hei hi zawm ve turin Ukraine a ngen nghal bawk.

Russia Parliament, Kremlin-in a tarlan danin, Russia leh Ukraine ramte hian Orthodox Krismas an lawm dawn vangin inkahhai hi puan a ni. Hei hi nikum February thlaa Russia-in Ukraine ram a run hnua inkahhai a puan hmasakna ber a ni.

Russian Orthodox Church hotu Patriarch Kirill chuan Orthodox Krismas puala inkahhai puang tura a ngen hnuah, President Putin hian a puang ta nia sawi a ni.

Russian Orthodox Church hian Julian calendar hmangin, Krismas hi January 7-ah an lawm ṭhin. Ukraine ramah pawh Orthodox Krismas hi mi tam takin an lawm ṭhin a, sorkar chuan December 25 bakah January 7 hi holiday-ah a puang a ni.

Hetih lai hian Ukraine president Volodymyr Zelenskyy chuan Russia-in inkahhai a puan hi an pawm loh thu leh, Donbas biala Ukraine sipaiten hma an sawn zel vanga lo danna tura a ruahmanna, ralthuam leh hmanrua tam zawk lakluhna remchang a zawn vang mai niin a puh thung.

Zelenskyy-a adviser Mykhailo Podoliak pawhin Russia sipaiten Ukraine ram an chhuahsan chauhin inremna hi a awm thei ang tiin a sawi.

United Nations chuan Russia-in ni hnih chhung inkahhai a puang chu lawmawm a tih thu sawiin, ram pahnihte chu an indona titawp thuai turin a ngen zui bawk. UN thupuangtu Stephane Dujarric chuan indona tihtawp a nih theihna tura hmalakna eng pawh chu ṭha an tih thu a sawi a ni.