Vietnam Parliament-in deputy PM 2 a ban

Vietnam Parliament, National Assembly chuan eiruk dona beihpui thlakna kal zelah an ram deputy prime minister pahnihte a ban.

Parliament-ah hian Ningani khan deputy PM pahnih - Pham Binh Minh leh Vu Duc Dam-te banna tur hian vote lak a ni. Vote laknaa member 484 awm zingah 476-ten deputy PM pahnihte ban hi an thlawp a,member pathumin vote an thlak lo thung. Deputy PM atan environment minister, Tran Hong Ha leh Haiphong City-a Communist party hruaitu Tran Luu Quang-te ruat an ni nghal bawk.

Minh leh Dam-te hi ban ni mah se man an ni lo a, thubuai pawh siamsak an ni lo bawk. Ban an nihna chhan tak hi Parliament chuan a sawilang lo.

Sorkarin eiruk dona a kalpuina hnuaiah hian health minister pawh ban a lo ni tawh bawk a, sumdawng lian ṭhenkhat pawh hren an ni bawk a ni. Vietnam police-te chuan Ningani khan Malaysia-a ambassador hlui, Tran Viet Thai chu a thuneihna leh nihna dik lo taka hmanga puhin an man bawk.