Mexico-in drug lord 'El Chapo' fapa man

Mexico security force-te chuan drug lord 'El Chapo' fapa, Ovidio Guzman an man. Guzman hi US-in ruihhlo tawlhruk chungchangah man tuma a zawn mek niin, man a nih theihna tura a awmna chin hrilh thei hnenah lawmman, USD mtd 5 pek a tiam a ni.

Defence secretary Luis Cre­sencio Sandoval chuan Army leh National Guard-ten Ningania beihpui an thlaknaah Ovidio hi Culiacán-ah man a ni a, Mexico City-ah hruai nghal a ni tih a sawi.

Ovidio Guzmán hi “The Mouse,” tia sawi a ni ṭhin a, a pa enkawl ṭhin, khawvela ruihhlo tawlh ṭhin pawl lian ber zinga mi, Sinaloa cartel a enkawl nia sawi a ni. Ruihhlo tawlhnaah a inhnamhnawih nasat bakah, fentanyl siamnaah pawh a tel nia sawi a ni. US chuan an rama cocaine, methamphetamine leh marijuana tawlhluh leh semdarh­naah a inrawlh tih an sawi bawk.

El Chapo fapa man a nih hnu hian gang member thinrimte chuan kawngpuite dangin, motor-te an hal a, airport an bei zui bawk. Buaina chhuakah hian security force member pathum an thi a, Sinaloa airport pathumah flight 100 chuang cancel a ni.

Kum 2019 khan security force-te chuan Ovidio Guzmán hi an lo man tawh a, mahse Ovidio thlawp­tute buaina an chawh chhuah venthawn thilah an chhuah leh a ni.