Brazil President nupui leh A cabinet minister-in hri kai

Brazil President Jair Bolsonaro chu Covid-19 a kai hnuah enkawl dam a ni tawh a, mahse a nupui Michelle Bolsonaro leh a cabinet minister zinga mi, Marcos Pontes-te chuan hri hi an kai tih hriat a ni ve leh. 

Science and technology minis­ter Marcos Pontes chuan hri a kai thu hi a twitter-ah tarlangin, a lu a na tel a, mahse ngaihtuahawm a ni lo tih a sawi. Brazil sorkarin Covid-19 kai na vak lote enkawlna atana a pawm, anti-viral drug nitazoxanide enchhinna atan pawh a inpe nghal dawn tih a sawi. President nupui, Michelle Bolsonaro pawh a ngaihtuahawm lo tih sorkar thuchhuah chuan a tarlang bawk. 

Republican party presidential candidate nih tuma lo bei tawh, Herman Cain chu July 30 khan kum 74 mi niin Covid-19 vangin a thi. Herman Cain hi US president Donald Trump thlawptu a ni a, Trump-a'n Tulsa leh Oklahoma-a rally a neihnaah a tel ve a, a hnu ni kua, June 29 khan Covid-19 hri hi a kai tih hriatchhuah a ni ta a ni. Cain hi Trump hoa a tira hmaituamna hmang duh lo pawl zinga mi kha a ni. 

Kum 2006 khan Cain hi cancer (stage 4) natna a lo vei tawh a, mahse a dam leh tawh a ni. Hri a kai tih hriat a nih hnu July 1 khan damdawi-inah dahluh a ni. A thihna chungchangah hian Trump chuan Cain hi mi bik tak a nih thu a sawi a, America ram pasalṭha a nih thu a sawi bawk.

Covid-19 kai chu khawvel ram hrang hrangah nimin thleng khan mi 1,74,99,767 an awm tawh. Hri kai zinga 1,09,56,538 chu enkawl dam an ni tawh a, mi 6,77,184 in an thihpui tawh thung. Hri kai mek zinga 99%, mi 57,99,690 chu taksa lama harsatna lian tham nei lo an ni a, mi 66,355 (1%) erawh chuan an dinhmun a ṭha lo thung.