Tel Aviv-ah Israel sorkar thar duh lohna lantir

Israel prime minister Benjamin Netanyahu kaihhruai, right-wing sorkar thar chu democracy leh mipuite zalenna dinhmun tiderthawng thei nia sawiin, Inrinni khan Tel Aviv-ah mipui tam takin duh lohna an lantir.

Right-wing sorkar hi kar liam ta khan lakluh a ni a, sorkar thar hian Palestinian ram a luah, West Bank-a Juda mite chenna hmun a siam pawh zauh zel tumin ruahmanna a siam a ni.

Tel Aviv-a Habima Square-a pung­khawm hi mi 10,000 chuang anni a, pungkhawmte chuan sorkar thar chu democracy tana hlauhawm a ni tih thuziakte an keng. Nawrh hi left-wing leh Israel Parliament, Knesset-a Palestinian member-ten an huaihawt a ni. Israel Supreme Court thuneihna tihnepsak theihna tur, judicial system thar tlangzarhtu justice minister Yariv Levin chu na takin an sawisel bawk.

Pungkhawmte chuan sorkar thar chu legal system laka indo puangah an puh a, sorkar tharin ruahmanna a siam chu democratic institution-te hnuaichhiahna, ṭangrual sorkar lakah thuneihna sang tak pekna tur a ni, an ti. Hetianga an kal zel chuan an rama mipuite rorelna chu nuai boin, awmze nei loin mimal rorelna ramah an awm mai a hlauhthawnawm tih an sawi a ni.

Juda leh Palestinian-te inkara boruak ṭha tak leh, inngeih taka an chen ho an duh thute sawiin, sorkar thar hnuaiah hian LGBTQ, Palestinian leh minority dangte dodalna tur dante siam tuma hma lak a ni tih Palestinians and Jews grassroot movement, Standing Together hruaitu chuan a sawi.