Russia-in inkahhai a tawp rualin Ukraine bomb leh nghal

Russia chuan Orthodox Christmas puala ni hnih chhung Ukraine lakah inkahhai a puan a tawp rualin, Inrinni zanlai pelh khan Ukriane khawchhak lam a bomb leh nghal.

Russia president Vladimir Putin chuan Zirtawpni leh Inrinni atan inkahhai hi a puang a, mahse hei hi Ukraine lam chuan an pawm ve lo tih an sawi thung. Russia-in inkahhai a puan chu indona hmuna Ukraine sipaite hmasawn zel danna tur leh, ralthuam lakluh belhna remchangah hman a tum vang niin an puh.

Ukraine khawchhak lam, Kharkiv bial beihnaah hian mi pakhat a thi nia sawi a ni. Donetsk region governor Pavlo Kyrylenko chuan Inrinni zanlai pelh hnuah an bial chu missile pakua hmanga kah a ni tih a sawi a, Zaporizhzhia region-a khawpui pawimawh Zaporizhzhia pawh beih a ni bawk.

Inrinni khan Ukraine nena indo mek, Russia sipaite pui turin Ukraine ṭhenawm, Belarus-a Vitebsk khuaah Russia sipai hi 1,400 - 1,600 vel an thlen belh nia sawi a ni.