China-ah khualzinte tan 'Zero-Covid' tihtawp a ni ta

China-in Covid-19 hri leng avanga khuahkhirhna khauh tak, ' siamte chu sut zel a ni a, nimin khan ramdang khualzinte tana khuahkhirhna a siam ṭhin pawh tihtawp a ni ta.

Nimin aṭang khan China-a khualzin lutte inkhunghrang hmasa ṭhin tura tih chu tihtawp a ni. China rama lut turte tan hian darkar 48 chhunga Covid test negative result neih la ngai tho mah se, kum thum chhung ramria khuahkhirhna khauh tak a siamte a tihtawp tak avangin khualzin pawh an pun chhoh leh phah hle rin a ni. Ram danga China mi awm, Lunar New Year hmang tura haw pawh an tam hle rin a ni bawk.

China hian Covid-19 hri len tirh aṭangin khuahkhirhna khauh tak a siam nghal a, kum thum zet hman a nih hnuah mipuiten lungawi lohna an lantir fo hnuah a thlahdul chho a, tunah chuan khuahkhirhna khauh tak tak a lo siam tawhte chu a hlip ta vek a ni. Zin veivakte tana khuahkhirhna siam hlih kumin Lunar New Year-a zin veivak hi mi maktaduai tel an awm rin a ni. Hripui len hma khan he hun pawimawh hmang tura China mi haw an tam avang leh, a chhim tura kal an tam avangin kumkhat chhunga zin veivak tam ber lai a ni hial ṭhin. Tunkar chho hian Hong Kong aṭang pawhin Beijing, Xiamen leh khawpui danga kal tum hi mi nuai 4 vel an awm.