US aṭanga Bolsonaro Chhuahtir turin Biden an ngen

United States chuan Brazil president hlui Jair Bolsonaro vangin buaina lian tak an tawk mek. Far right hotu, Bolsanoro chuan a term tawp hma ni hnih la awmah, October 30, 2022-a an ram inthlanpuiah a khingpui leftist, Luiz Inacio Lula da Silva a hneh zawh tak loh avangin January 1 khan an ram tlanchhuahsanin, Florida hi a pan. Mahse, Bolsonaro hian inthlan chhehvelah hun duh loh tak tak a hnutchhiah vangin Brazil presidential palace, Congress leh Supreme Court-te an luhkhung a ni.

Trump ṭantute'n kum hnih liam taa US Capitol an luhchilh hnuah, Democratic President Joe Biden pawhin Orlando khawpui fema tawmhimna zawnga tlanchhia chu an ram chhuahsan tura nawrtu mi ṭhahnem tak a tawng chho mek.

"Bolsonaro hi Florida-ah a awm tur a ni lo. United States chu Brazil-a tharumthawhna chawkchhuaktu hi humhimna an pe tur a ni lo," tiin Democratic Congressman Joaquin Castro chuan thutlukna dik siam turin Washington a ngen.

Bolsonaro hian president a nihna aṭanga a inhnuhdawh hnuah, venhimna mumal tak a dawng tawh lo a ni. A thubuaite ngaihtuah an nih hunah, man emaw office luah thei lo turin emaw an hrem thei dawn a ni.

U.S. consular official sawi danin, Bolsanoro hi A-1 visa hmangin an ram a rawn lut a, a term tawp hmain US leilung a luh avangin official-te chuan A-1 hi a la nung reng niin an sawi. A visa hi a nun miau avang hian engtika rei nge US-ah hian a cham theih tih an sawi lo a ni.