Australia tuilian vangin Mi 100 chuang sawn chhuak tawh

Australia hmarthlang lam, Kimberley khaw chhehvela tuilian rapthlak tak avangin sipai thlawhtheihna chuan chhanchhuah hna ngawrh takin an thawk mek a, mi 100 chuang hmun him lamah an thiarchhuak tawh a ni. Kimberley khua hi California state tiat zeta lian a ni a, kum 100 chuang zet chu tui hi a lian tawh lo niin khuarel chhiatna thleng pawh hi mak an tih thu rescue official-te chuan an sawi.

Kimberley state-a tropical cyclone thleng hi, Ellie tihin an vuah. "Kimberley khaw mite chuan kum 100 dana thleng tuilian rapthlak tak an tuar a, Australia khawthlang lam chanchinah tuilian rapthlak ber a ni. Tui chu hmun tinah hmuh tur a awm," tiin Western Australia Emergency Services minister Stephen Dawson chuan a sawi.

Tuilian thlen chhanah, Australia khawchhakah kum hnih liam ta chhunga La Nina weather event vanga tuilian rapthlak tak hnukhawi a nih theih thu an sawi. Region chhak lamte chuan La Nina vangin kum kalta khan tuilian na bik vawi li an tawng a, a kumtela ruahtui tlak hnem vang niin mithiamte chuan an ngai.

Prime Minister Anthony Albanese chuan Inrinni kalta khan, an rama tuilian thleng chu pawi a tih thu sawiin, sorkar aṭanga chhawmdawlna pek a tiam. Australian Defence Force (ADF) aircraft chu tuilian tuarte ṭanpuina atan hman a ni a, Chinook helicopter-te chu hmun him lama sawnchhuahnan an hmang bawk tih thuneitute chuan Pathianni khan an sawi.