Myanmar sipaiten helpawlte inthlan neih tur chungchang sawipui

Myanmar sipai thuneitute chuan helpawl pathumte chu an pawl thunun, region pathuma inthlan neih dan tur chungchang an sawipui.

Inrinni liam taa Naypyi­daw-a sipai hotute nena inbiakna neite hi Shan State Progress Party, United Wa State Party, leh National Democratic Alliance Army-te an ni. Heng pawl pathumte hi sipaiten thuneihna an chan hnua tualchhung buaina thleng hrang hrangah an inrawlh nasa nia sawi a ni.

Nikum December thla khan sipaite hian helpawl dang panga pawh inbiakna an lo neihpui tawh a, inbiakna neih hnuah helpawlte hian sipai sorkarin inthlan buatsaih a tum chu an thlawp thu an chhuah zui bawk.

Sipai sorkar hian an ram inthlanpui chu felfai leh dik taka buatsaih an tum thu an lo sawi tawh a, a hun tur erawh an an puang lo. Mahse kumin kumtawp lamah inthlan hi an buatsaih rin a ni. Hemi rual hian sipaite hian inthlan an buatsaih tur hi an thuneihna sawhngheh zualna remchangah hman an tum tih ring tam tak an awm ve bawk.

Myanmar sipaite hian kum 2021 February thla khan civil sorkar thuneihna hnehchhuhin ro an rel zui a ni. Civil sorkara hruaitute manin thubuaite an siamsak zui bawk. Aung San Suu Kyi pawh manin thubuai eng emaw zat a siamsak a, heng thubuaiahte hian court chuan thiam loh a chantir vek a, a vaiin kum 33 tang tura hrem a ni. Hei vang hian inthlan hi buatsaih pawh ni se, Suu Kyi-i hian a chuh ve thei dawn lo a ni.