Brazil President hlui Bolosnaro-a damdawi-inah lut Bolsonaro thlawptute chet dan duh lohna lantir

Brazil president hlui, US-a khawsa mek Jair Bolsonaro chu a pum na avangin Thawhṭanni khan Florida hospital-ah dah luh a ni tih a nupui, Michelle Bolsonaro chuan a sawi. Hetih lai hian Bolsonaro thlawptute chuan Pathianni khan Brazil khawpui, Brasilia-a President thar duh lohna lantirin sorkar building pawimawhte an bei a, buaina nasa tak a chhuak.

Kum 67 mi, Bolsonaro hi nikum Oct. 30-a President thar thlannaa leftist Luiz Inacio Lula da Silva a hneh loh hnuah, a term tawp hmain an ram chhuahsanin Florida, US hi a pan a ni. Brazilian mixed martial arts champion hlui, Jose Aldo inah a khawsa zui a ni.

Brazil-a O Globo chanchinbu chuan President hlui hi Thawhṭanni khan Orlando khaw daia Advent Health Celebration acute care hospital-ah admit a nih thu a sawi. Michelle Bolsonaro chuan a pasal natna hi kum 2018-a presidential campaign neih laia chema vih a nihna nghawng zel niin a sawi. Chema beih a nih ṭum hian Bolsonaro hian a thihpui ṭhelh a, ṭum ruk zet zai a ngai a, a hnu zelah pawh taksa lamah harsatna a tawh phah fo a ni.

Bolsonaro thlawptute chet dan duh lohna lantir

Hetih lai hian President hlui Bolsonaro thlawptuten Congress luhchilh a, buaina nasa tak an siam duh loin Brazil khawpui lian, Sao Paulo-ah mipuiten pro-democracy rally an huaihawt.

President thar atana Luiz Inácio Lula da Silva lakluh a nih hnuah Bolsonaro thlawptu, mi 4,000 vel chuan Pathianni khan lungawi lohna lantirin, an ram khawpui Brasilia-ah Congress leh Presidential Palace-te luhchilhin an suasam a, Supreme Court building beiin chamber-te an tichhe bawk. Police-te chuan water cannon leh stun grenade hmangin pungkhawmte hi an hnawtdarh a ni. Buaina siamtu zinga mi 1,500 vel chu man an ni tawh.

Sao Paulo khawpuia kawngzawhte chuan President hlui Bolsonaro chu man an phut thu an sawi. Brasilia khawpuia thil thleng chu an dem thu leh, pawikhawihtute chu hremna pek ngei an phut thu an sawi bawk.

Brasilia-a pawikhawihna nasa tak thleng vang hian Supreme Court chuan Brasilia governor Ibaneis Rocha chu ni 90 chhung a chawlh tir. Justice minister Alexandre de Moraes chuan Governor chu buaina chhuak dang zo lo leh, pawikhawihna a thlen lai pawha ngawi renga lo thlir liamah a puh.

Bolsonaro thlawptute chet dan hi ram hrang hrang hruaitute chuan an dem thu an lo sawi tawh bawk a ni. Bolsonaro pawhin a twitter-ah Brasilia-a pawikhawihna thleng chu a dem thu leh, he thilah hian inhnamhnawihna a neih loh thu a sawi.