Iran-in President hlui fanu kum 5 tang turin hrem

Iran court chuan an ram president hlui, Akbar Hashemi Rafsanjani fanu Faezeh Rafsanjani chu kum nga tang turin a hrem.

Rafsanjani lawyer chuan hrem a nihna chhan hi a sawichiang lo. Mahse state media chuan nikum September thla khan hijab hmang ṭha loa puha man, Kurdish hmeichhia thihna thleng vanga sorkar laka lungawi lohna lantirtu mipute fuiha puha man a ni tih an lo tarlang tawh a ni.

Kum 2012 khan President hlui Faezeh Hashemi hi sorkar dodal zawnga thiltia puh chungchangah jail tang tura hrem leh, politics a khelh khapsak a lo ni tawh bawk.

Iran court chuan sorkar laka lungawi lohna lantirtu a man zinga pathum chu Pathian laka hel tia puhin thi turin an chungthu a relsak leh. Kar liam ta Inrinni khan Iran hian nawrh huaihawtnaa buaina chhuah ṭuma security force thattua puh, mi pahnih chu a lo khaihlum tawh bawk.

Iran supreme leader Ayatollah Ali Khamenei chuan nawrh huaihawtte lakah sorkar chu a nem dawn lo tih sawiin, vantlang hmun bei leh suasamtute chu ram phatsantute an ni, a ti. Iran-in Islamic law a hman mek hnuaiah, phatsantu chu thi tura hremna pek theih an ni.