Indonesia-ah magnitude 7.6-a nain lir a nghing

Indonesia khawchhak lamah nimin zing, an ram huna zing dar 3.17 khan magnitude 7.6-a nain lir a nghing a, in tam tak a sáwi chhia. Lirnghing hi Australia hmarlam thlengin an hre thei a ni.

European Mediterranean Seismo­logical Centre (EMSC) in a tarlan danin, lir nghin ṭanna hi Maluku province-a Tanimbar island bul, Banda Sea-a lei hnuai km 97 velah a ni. Papua leh East Nusa Tenggara province-te pawh a sawi tel bawk.

Lirnghingin thil a tihchhiatte hi kimchanga hriat a la ni lo a, hriat theih chinah Tanimbar islands-ah school building pahnih leh chenna in 15 a chhia a, hliam tuar pakhat a awm.

Indonesia Meteorology, Climatology, and Geophysical Agency chuan tsunami warning a tichhuak nghal a, mahse darkar thum hnuah a sut leh.

Indonesia hi tectonic plate-te insutna, Pacific Ring of Fire-a awm a nih avangin lirnghing an tuar fo a ni. Nikum November 21 khan West Java province-ah magnitude 5.6-a naa lir nghingin chhiatna a thlenah mi 602 an thi a ni.