Thailand-a ruihhlo tawlhru ṭhina puh apartment dapnaah Myanmar sipai hotu fate bankbook hmuh a ni

Thailand official-ten an rama ruihhlo tawlhru ṭhina puh, Myanmar mi Tun Min Latt chenna, Bangkok apartment an dapnaah, Myanmar sipai hotu lu ber, Min Aung Hlaing-a fanu leh fapa bankbook leh document dangte hmuh a ni tih an sawi.

Kum 53 mi, Tun Min Latt hi nikum September thla khan Bangkok-ah Thailand mi pathumte nen ruihhlo tawlh luh tum leh, dik lo taka sum hmuhte thup tuma puh chungchangah man an lo ni tawh a ni.

Tun Min Latt hian hotel, energy leh mining lam pawh a buaipui tel. Kum 2021, Ferbuary thlaa sipai chakna hmanga Myanmar civil sorkar paihthlatu, sipai hotu lu ber Min Aung Hlaing nena inpawh ṭha tak niin, sipaite hmarua tur pawh a supply ṭhin nia sawi a ni. Kum 2019 arms fair-ah pawh khan an pahniha thla lak dunte hmuh tur a awm a ni.

Min Aung Hlaing-a fapa Aung Pyae Sone leh a fanu Khin Thiri Thet Mon-te hi US leh Canada sorkarin a hrek zingah an tel. Bangkok apartment dapnaah an bankbook leh document dangte man a nih chungchangah hian thubuai siamsak an ni lo nia sawi a ni bawk.

Activist group, Justice for Myanmar chuan Bangkok apartment-a Min Aung Hlaing-a chhungte document hmuh hian Thailand ramah thil tam tak an chheprelh ngei a ni tih a tichiang niin an sawi a, Thailand sorkar hnenah Myanmar sipai sorkara official-ten Thailand bank-a sum leh an thil neih dang chheprelh an tumna chu dang tura hma la turin an ngen. Hengte hi Myanmar mipuite ta vek a ni, an ti.

Bangkok-a Tun Min Latt apartment an dap ṭum hian Thailand police-te chuan a thil kawl hrang hrang, luxury car, sana leh bag USD mtd 8.96 hu bakah, pawisa fai USD 2,39,091 an man tel a ni.