Israel Security Minister-in vantlang hmuna Palestinian flag zar khap

Israel-a sorkar thara national security minister, Itamar Ben-Gvir chuan police-te hnenah vantlang hmuna Palestinian flag inzarte chu la thla vek turin a hriattir a, Palestinian national symbol chu firfiaka chetna lantirtu a ni, tiin a sawi.

Israel ram danah Palestinian flag zar hi khap a ni kher lo a, mahse police leh sipaite chuan mipuite tan a him lo nia an ngaih chuan la thla turin dikna an nei thung. A hma pawhin Israel thuneitute chuan Palestinian flag zar hi an lo lak thlak tir fo tawh a, hei hi Palestinian lam chuan na taka sawiselin, Palestinian mite rahbehna tiin an puh a ni.

Ultranationalist Jewish Power party hotu, Ben-Gvir hian Israel sipai a thah avanga kum 40 zet jail a tan hnuah kar liam taa chhuah, Palestinian mi chu Israel hmarlama an khuaa amah lo hmuaktute hmaa Palestinian flag a vai hnuah he thupek hi a tichhuak a ni. Minister chuan Palestinian flag lo vai chu firfiaka chetna an thlawpzia lantirna a ni, a ti. 'Hetianga firfiaka chetna thlawpna lantir a, mipuite cho phurna turin firfiakte flag hi vai a ni tur a ni lo. Hei vang hian vangtlang hmuna firfiakte thlawptu flag inzarte lathla vek tur leh, Israel huatna chawk chhuak zawnga chet titawp turin ka ti a ni," a ti.