Paris Train Station-a chemtea inbeihnaah mi ṭhahnem takin hliam an tuar

France khawpui, Paris-a rel chawlhhmun lun tak, London leh Europe hmar lam pan rel tlan ṭhinna Gare du Nord station-ah nimin khan mi pakhat chuan chemte hmangin mi a pawng beih a, mi ṭhahnem takin hliam an tuar tih thuneitute chuan an sawi.

Pawikhawihtu hi mipa niin, police-te chuan an kahhliam hnuah an man nghal tih an sawi. "Mi pakhat chuan tukin khan Gare du Nord-ah mi ṭhahnem tak a hliam. A hmunah man nghal a ni a, police hmalakna leh huaisennate a fakawm hle a ni," tiin Interior minister Gerald Darmanin chuan a twitter-ah a sawi.

Nimin zinga pawikhawihna thleng vang hian train station tam tak chu a khaihlak phah a, an chhuah hun tura chhuak thei lo rel tangkhang an tam phah hman hle.

Pawikhawihtu chetlakna chhan hi tarlan a la ni lo. Kum 2015-a Islam mite'n an ramah tharum thawhna rapthlak tak an thlen hnuah venhimna khauh zawkin an kalpui tawh a ni.