Russia President-in Ukraine-a a commander thlak

Russia president Vladimir Putin chuan Ukraine rama beihpui thlak mek, Russia sipaite hotu atana a dah, general Sergei Surovikin chu thla thum chauh a awm hnuah a thlak.

General Surovikin thlak tur hian chief of the General Staff Valery Gerasimov chu ruat nghal a ni a, Ukraine rama 'special military operation' neih chu a ho dawn a ni. General Gerasimov hi kum 2012 aṭang khan chief of general staff niin, Soviet ram kehdarh hnua he post chelh rei thei ber a la ni.

President Putin-a'n comman­der a thlak tak, general Surovikin hi Russia-in Syria a do ṭum pawha che rawva thei tak nia sawi a ni a, rawng tak taka a chet ṭhin avangin a hmingah 'General Armageddon' tihte vuah a lo ni tawh. Nikum October thla khan Ukraine-a beihpui thlaknaah hotu atan hian dah a ni a, hemi hnu hian Russia sipaite hian Ukraine energy infrastructure lamte nasa takin an bei zui nghal a, civil mi tam tak chu thlasik khawvawt tak hnuaia power leh tui supply nei mumal loin an awm phah a ni.

Russia hian Ukraine nena an indo mekah, hun eng emaw chen an hnungtawlh hnuah tun hnaiah Ukraine khawchhak lamah hma an sawn chho leh mek tih an sawi.

Russia defence ministry chuan Gen Surovikin thlak a nihna chhan chu Russia sipai branch hrang hrang amite'n inpawhna ṭha zawkte, sipai inrelbawlna siamṭhat leh awmze nei zawka kalpui a nih theihna atan niin a sawi.

Mahse mi ṭhenkhat chuan Gen Surovikin hi thuneihna a neih chak chhoh avang leh, defence minister Sergei Shoigu a lehpel chho thei mai dawn nia a lan avanga thlak nia an ngaih thu an sawi ve thung.