Computer system buaiin minute 90 chhungin US flight 10,000 chuang nghawng

U.S-a Federal Aviation Administration (FAA) chuan Nilaini khan computer system a buai avangin minute 90 chhung US aṭanga thlawk chhuak tur flight a titawp a, hei hian flight 10,000 chuang zet a nghawng hman.

FAA thuchhuah avang hian flight 10,000 chuang tihkhawtlai niin, flight 1000 chuang cancel a ni bawk tih sawiin, hei hi kum 20 chhung a thlen ṭum khatna a ni tih FlightAware chuan a tarlang.

Airline lian - Southwest Airlines Co, United Airlines, Delta Airlines leh American Airlines-te chuan Nilainia computer sytem buai hian an flight 40% chuang a nghawng tih an sawi a, mahse nimin lam aṭang khan service hi a pangngai leh nghal a ni.

FAA official-te chuan database file chhiat dan hi an chhui nghal a, mahse cyberattack lam a nih a rinawm lo niin an sawi. Nakin zelah buaina a awm nawn tawh lohna turin a buaina chhan hi chhui chhuah ngei an tum tih an sawi.