Khawvela passport thiltithei berah Japan passport

Henley Passport Index-in a zirchianna aṭangin, Japanese passport chu a zawna a kum ngana atan khawvela passport thiltithei berah thlan a ni leh.

Japanese passport hmang hian ram 193-ah visa ngai loin a kal theih tih Henley Passport Index 2023 chuan an tarlang.

Japan dawtah hian visa ngai loa ram 192 kal theihna, Singapore leh South Korea passport awmin, top 10 zingah hian visa ngai loa ram 190 kal theihna Germany leh Spain, ram 189 kal theihna Finland, Italy leh Luxembourg, ram 188 kal theihna Austria, Denmark, Netherlands leh Sweden, ram 187 kal theihna France, Ireland, Portugal leh United Kingdom, ram 186 kal theihna Belgium, Czech Republic, New Zealand, Norway, Switzerland leh United States, ram 185 kal theihna Australia, Canada, Greece leh Malta, ram 184 kal theihna Hungary leh Poland, ram 183 kal theihna Lithunia leh Slovakia passport-te an awm.

Hetih laiin, visa ngai loa ram 27 chauh kal theihna, Afghanistan passport chu passport thiltithei lo berah thlan niin, Iraq, Syria, Pakistan, Yemen, Somalia, Nepal, Palestinian Territory, North Korea, Bangladesh, Kosovo, Libya, Democratic Republic of Congo, Lebanon, Sri Lanka leh Sudan passport-te chu visa ngai loa ram kal theihna tlemnate an ni. Indian passport neitute chu ram 59-ah visa ngai loin an kal thei a, kum hmasaah 87 niin, kuminah erawh 85-na dinhmun an rawn hauh a ni.

Kum 20 dawn liam taa Dr Christian H Kaelin-a'n a din, Henley & Partners hian International Air Transport Association (IATA) official data aṭangin ram hrang hrangte passport zirchianna hi kumtin a nei ṭhin.