2019 Easter Sunday-a bomb puak tuartute Zángnadawmna pe turin Sri Lanka President hlui hriattir

Sri Lanka Supreme Court chuan kum 2018 Easter Sunday-a bomb puak tuartute hnenah zángnadawmna pe turin president hlui Maithripala Sirisena leh midang palite a hriattir. Kum 2019-a bomb puakah hian mi 270 an thi a ni.

Judge pasarih awmna Supreme Court bench chuan President hlui Sirisena, hetih laia police hotu lu, intelligence official pahnih leh ministry of defence-a secretary te chu hma la ṭha lo leh, bomb puak tuartute leh an chhungte dikna chanvo palzutsak an nih avangin zangnadamwna hi pe turin a ti. President hlui hi rupees mtd 100 (USD 2,73,300) pe tura tiin, midang palite nen an vaiin rupees mtd 210 (USD 5,74,000) pe turin a hriattir.

He pawikhawihna thleng hi Islamic State group thawhpui, tualchhunga Muslim pawl pahnihte tih nia sawi a ni. Easter Sunday ni hian biak-in pathuma Easter service neih laiin bomb hi tihpuah a ni a, hotel pathum beih tel a ni bawk.

Bomb tihpuah a nih hma hian Sri Lanka thu­nei­tute hian foreing inte­lli­gence lam aṭangin pawikhawihna thlen tum a nih thu hi an dawng lawk a, mahse sorkar lam hian pawikhawihna thleng tur veng tur hian hma a la lo nia sawiin, Sirisena leh sorkar lamin dem an hlawh hle.

Court chuan pawikhawihna thlen laia President, Sirisena hian defence minister leh armed forces command-in-chief a ni chungin, ram himna chungchang ngaihtuahin national security council meeting pawh a ko mumal lo a, meeting pawimawhah pawh a tel lo fo niin a tarlang.