China-a Covid-19 hri leng vanglaiin thla 2-3 awh dawn

China rama Covid-19 hri leng vanglai chuan thla 2-3 a awh dawn a, damdawi lam enkawlna ṭhat tawk lohna thingtlang lamah a darh belh thuai dawn niin Chinese epidemiologist Zeng Guang chuan a sawi.

January 21 aṭanga hman ṭan tur, Lunar New Year holiday hmang turin mi nuai tel chu thingtlang lamah an haw dawn a, hei hian hri hi nasa takin a tidarh zual dawn niin Chinese Center for Disease Control and Prevention-a chief epidemiologist hlui Guang chuan a tarlang.

Covid-19 hri len tirh aṭanga hri darh tur venna atana China sorkarin khuahkhirhna khauh tak a siam chu kum thum hman a nih hnuah mipuiten nasa takin an sawisel a, nawrh hialte an buatsaih a ni. Hei vang hian sorkar chuan nikum November thla tawp lam aṭang khan khuahkhirhna a siam hrang hrangte hlip chhoin, Pathianni liam ta khan border pawh a hawng leh vek tawh a ni. Khuahkhirhna hlih a nih hnuah ram chhungah hri hi a darh chho nasa hle a ni.

Zeng Guang chuan hri leng mek chu a la hluar belh zel dawn tih sawiin, hri leng khuah­khirhna kawngah khawpui lam chauhah insawrbing loin, rural area lam pawh an ngaihven a ṭul thu a sawi.

World Heath Organisation (WHO) pawhin China-in khualzinte tana khuahkhirhna a siamte a tihtawp tak avang leh, Lunar New Year holiday hmang tura mi tam tak an zin luh dawn vangin, khualzinte aṭangin hri hi a darh chho leh a hlauthawnawm thu a lo sawi tawh a ni.