A ina document pawimawh hmuh chungchangah US President Joe Biden chhui chian a ni dawn
US President Joe Biden chu a chawlh hmanna ṭhin, Delaware, Wilmington-a a inah document pawimawh hmuh a nih chungchangah prosecutor-in a chhui chiang dawn. Hemi hma hian a office hluiah secret paper hmuh a lo ni tawh bawk.
US attorney general Merrick Garland chuan President Biden chhui chiang tur hian independent prosecutory, Robert Hur a ruat. President thiltih hian dan a bawhchhia em tihte a chhui zui ang.
White House chuan Washington-a Biden-a office hluia document pawimawhte hmuh a nih hnuah, Wilmington-a a garage-ah a dang hi hmuh leh a ni tih sawiin, hmun pahniha document hmuhte hi vice president a nih lai amite nia sawi a ni. White House chuan paper hmuhchhuahah thil inziakte erawh a tarlang lo.
Republican lam chuan White House chu na taka bei nghalin, President thil tih dik lo thup tumah an puh a, a hranpain anmahni ngeiin an chhui tur thu an puang bawk.