Nepal-ah mi 72 chuanna thlawhtheihna a chesual

Nepal ramah nimin khan mi 72 chuanna thlawhtheihna a tla a, report kimchang hriat la ni lo mah se thi zat hi 44 an tling nia sawi a ni.

Thlawhtheihna hi Nepal khawpui, Kathman­du aṭanga tourist town, Pokhara pana thlawk a ni a, a tlak hnuah hian a kang zui a ni. Hliam na tak tuar eng emaw zat awm bawkin, hengte hi damdawi-in lam panpui nghal an ni.

Yeti Airlines thlawh­theihna, twin-engine ATR 72 aircraft-ah hian passenger 68 leh crew pali an chuang a, khualzin chuang zingah hian ram dang mi 10 an tel. Aviation authority chuan a thlawhchhuah hnuah chawhma dar 10:50 vel khan Seti Gorge aṭangin airport an bepawp a, hemi hnu hian a chesual ta niin an sawi.

Nepal prime minister Pushpa Kamal Dahal chuan chetsualna thlen hnu hian emergency meeting a ko nghal a, chetsualna thlen dan chhui tur panel a din a, ni 45 chhunga report thehlut tura tih a ni.

Nimina chetsualna thleng hi kum 2018, March thlaa Kathmandu airport-a a ṭum dawna US-Bangla Dash 8 turboprop flight chesual, mi 51 thihna thlen hnua Nepal rama thlawhtheihna chetsualna thleng leh rapthlak ber a ni tih Aviation Safety Network chuan a tarlang. Kum 2000 aṭang khan Nepal ramah hian thlawhtheihna chetsualna vangin mi 309 an lo thi tawh a ni.

Flight tracking website FlightRadar24 chuan Yeti Airlines thlawhtheihna hi kum 15-a upa ni tawhin, transponder pawh a upa tawhin a data pawh a rintlak tawk lo niin a sawi. Data quality hi chhuichian an tum mek tih an twitter-ah an tarlang.