Israel-ah sorkar thar hmalak tumna duh lohna lantir

Israel prime minister Benjamin Netanyahu-a kaihhruai sorkarin an ram legal system thlak a, Supreme Court thuneih­na tihnep sak a tum duh lohna lantirin, Inrinni liam ta khan khawpui pathumah mi tam tak an pungkhawm.

Tel Aviv, Jerusalem leh Haifa-ah lungawi lohna hi lantir a ni. Nawrh huaihawt a nih hma hian national security minister Itamar Ben-Gvir chuan police-te hnenah nawrh huaihawtten kawngpui an dang emaw, Palestinian flag an vai emaw a nih chuan na taka action la turin a hriattir a ni.

Israel media-te chuan ruahsur hnuaia Tel Aviv-a Habima Square-a pungkhawmte chu mi 80,000 an tling niin an sawi. Kalkhawmte hian Israel flag kengin, sorkar thar an duhlohna thuziakte an kenglang bawk. Social media lamah chuan mi ṭhenkhat, Palestinian flag keng thlalak dahlante a awm bawk a ni.

Right-wing sorkar thar hian lakluh an nih aṭang kar hnih a liam awrh tihah, an ram legal system thlakna tur hian rawtna a siam a, he rawtna hnuaiah hian Supreme Court thuneihna chu tihnep a ni dawn a, Parliament-a simple majority vote hmangin court thutlukna hi sut sak theih a ni ang. Hei bakah hian judge ruat leh, legal adviser-te laka thuneihna chu Parliament kuta dah rawt a ni tel bawk.

Hetih lai hian nawrh huaihawtte chuan legal system thlak tumna hi Israel democracy rah­behna tur a ni tiin an sawi. Legal system thlak duh lotu zingah hian eptu pawl hruaitute bakah, attorney general hlui leh Supreme Court president-te pawh an tel.

Sorkar thar hian Pales­tinian ram an luah, West Bank-a Juda-te chenna siam belh zelna tur policy pawh kalpui a tum a, social reform policy pawh siam ṭhat a tum bawk a, hei hian LGBTQ community a nghawng ngei rin a ni.