China-ah thla 1 chhungin Covid kaihhnawiha thi mi 60,000 dawn an awm

China chuan an rama Covid-19 hri leng a hluar chhoh leh hnuah data a tichhuak ṭha lo a, hei vang hian ram hrang hrangte sawiselna pawh a tawk nasa hle. Hemi hnu, kar liam ta Inrinni khan report tichhukain, nikum December 8 leh kumin January 12 inkarah Covid kaihhnawihah thi mi 60,000 dawn an awm thu a tarlang.

Nikum kumtawp lama Covid khuahkhirhna hrang hrang a siamte a hlih chhoh hnuah, China hian hripui kaihhnawiha thi chungchang report a tihchhuahna hmasa ber a ni.

Health official chuan an rama hrileng chuan a vanglai a thleng chho tawh nia sawiin, damdawi-in hrang hranga dam lo enkawl pawh an tlahniam ṭan tawh tih a sawi.

National Health Commission (NHC)-a Bureau of Medical Administration hotu, Jiao Yahui chuan Inrinni-a media mite a kawmnaah, December 8 - January 12 inkara Covid kaihhnawiha hospital hrang hranga thi awm zat chu 59,938 a ni tih a sawi. Heng zinga mi 5,503 chu Covid hri an kai avanga thawk lama harsatna neite niin, a dangte chu Covid leh natna dang nei telte an ni, a ti.

Hetih lai hian international health expert-te chuan China ramah hian kumin chhungin Covid hri kaihhawihah thi hi mi maktaduai khat an tling thei dawn niin an chhut.

China report chungchangah hian World Health Organisation (WHO) chuan engmah sawi a la nei lo. WHO hian a hmain China chu an rama hri leng mek chungchangah, hri kai leh thihpui zat chungchangah report pe ṭha tawk lo leh, pe dik tawk loah a lo puh tawh a ni.