WHO-in Covid-19 information tam zawk tichhuak turin China ngen

China chuan an ram Covid-19 hri leng a hluar chhoh hnuah, kar nga chhunga a ṭum khatna atan kar liamta khan report tichhuakin, thla khat chhungin Covid-19 hri kaihhnawiha thi mi 60,000 dawn an awm thu a tarlang.

Hri leng a hluar hnuah China hian data a tih­chhuah loh avangin World Health Organisation (WHO) leh ram dangte sawisel a tawk nasa hle. Kar nga chhung zet hri leng chungchangah infor­mation a tihchhuah tawh loh hnuah, kar liamta Inrinni khan report tichhuakin, nikum December 8 leh kumin January 12 inkarah Covid kaihhnawiha thi awm zat hi a puang a ni.

WHO chuan China-in hri leng chungchanga an ram dinhmun, official information a tichhuak ta chu lawmawm a tih rualin a chiang tawk lo tih a sawi. Hri kai leh enkawl mek zat chungchangahte information leh data tam zawk tichhuak leh turin a ngen nghal bawk. Data thar leh rintlak tihchhuah chuan hri leng dinhmun hi an hriatthiam theih phah dawn a, hei hi an ram mipuite hnenah pawh hriattir tel zel turin a ngen.

Hetih lai hian expert-te chuan China National Health Commission-in hripui vanga thi zat a chhinchhiah hi a dik tawk an la ring lo a, thi zat hi an tarlan aiin an la tam zawk hle an ring tih an sawi. Mahse National Health Commission hian thite hi damdawi-ina thi chhinchhiahte an nih thu a lo sawi tawh a, hei vang hian damdawi-in ni lo, hri vanga in lama thi mi tam tak chhiar tel an ni lo nia rin a ni.

US-based Institute of Health Metrics and Evaluation (IHME) chuan China rama hri leng mek chuan April thla tir lamah a vanglai a thleng chho dawn niin a chhut a, kuminah hripui thihpui hi mi maktaduai khat chuang an awm dawn niin a chhut bawk. China ram mipui hmun thuma ṭhena hmun khat chuan Covid-19 hri hi an kai dawn a ni, tiin zirchianna an neihah an tarlang.

Hetih lai hian China official-te chuan an rama hrileng chuan tun thla tir lamah khan a vanglai a thleng tawh niin an sawi ve thung.