1960 hnua a ṭum khatna atan China-a mihring awm zat a tlahniam

China rama mihring awm zat chu kum 60 chhungin a ṭum khatna atan a tlahniam.

Nikum kumtawpah khan China rama mihring awm zat chu kum 2021 kumtawp aiin 850,000-in an tlem a, mi tluklehdingawn 1.4 an awm. Hei hi kum 1961-a Moa Zedong rorellai laia ṭam nasa tak a tawrh hnua mihring awm zat an kiam ṭum khatna niin National Statistic Bureau chuan a tarlang.

Kum 2022-ah China ramah hian nau piang maktaduai 9.56 an awm a, hei hi kum 1050 hnua kum khata nau piang an tlem ber ṭum a ni bawk. Hetih lai hian sorkar chuan one-policy a titawp a, fa pakhat aia tam nei turin a fuih mek thung. Kum 2021 khan nau piang hi maktaduai 10.62 an awm.

Nikum chhunga mitthi awm zat hi maktaduai 10.41 niin, kum hmasaa maktaduai 10 awm aiin thi hi an tam zawk hle. Kuminah hian China ramah Covid-19 hri nasa tak a len thar leh avangin he hripui thihpui hi maktaduai khat an tling thei dawn niin expert-te chuan an chhut.

China rama mihring awm zat tlahniam tur hi an lo chhut lawkin a thleng rang a ni. Kum 2019 khan United Nations chuan China mipui tam vanglai chu kum 2031-ah a thleng dawn niin a lo chhut a, mahse nikum khan ennawn lehin 2022-ah a peak hi a thleng tawh niin a sawi. Kum upa an tam chak a, hetihlai hian piang thar an tlem zel avangin hnathawk thei rual, labour force zat pawh a tlahniam ve zel. Sorkar chu kum upa zawkte hnena pension a pek turah pawh a insengso nasa tawh hle a ni.

National Statistics Buraeu-in a tarlan danin, an ram mipui zinga 62% chu hnathawk rual, working-age an ni. China hian kum 16-59 inkarte hi working age ah a chhiar a ni. Kum 10 liam taah khan working age hi 70% an la tling.

China bakah hian East Asia ram, Japan leh South Korea-ah an ram hausain changkang chho zel mah se, nau piang rate a tlakhniam zel avangin mihring an pung lo a, kum upa an pung chho zel thung.